ខេត្តព្រៃវែង៖ ប្រជាពលរដ្ឋរស់នៅឃុំអំពិលក្រៅ ស្រុកស៊ីធរកណ្ដាល ខេត្តព្រៃវែង បានសម្ដែងការព្រួយបារម្ភចំពោះគុណភាពគម្រោងស្ថាបនាផ្លូវបេតុងមួយខ្សែ នៅក្នុងមូលដ្ឋាន ដោយសង្ស័យថា ការអនុវត្តការងារនៅការដ្ឋានមួយចំនួនអាចមិនស្របតាមលក្ខណៈបច្ចេកទេស និងស្តង់ដារសំណង់ដែលបានកំណត់។
តាមការលើកឡើងរបស់ប្រជាពលរដ្ឋ ពួកគេបានគោរពស្នើសុំដល់ ឯកឧត្តម សួន សុម៉ាលីន អភិបាលនៃគណៈអភិបាលខេត្តព្រៃវែង ព្រមទាំង លោក ប៉ោ ពិឡុត នាយកទីចាត់ការផែនការ និងវិនិយោគខេត្ត មេត្តាចាត់ក្រុមការងារជំនាញចុះពិនិត្យ និងធ្វើអធិការកិច្ចជាបន្ទាន់ ដើម្បីផ្ទៀងផ្ទាត់គុណភាពការដ្ឋាន ព្រមទាំងពិនិត្យឯកសារបច្ចេកទេសពាក់ព័ន្ធ មុនពេលគម្រោងត្រូវបានបញ្ចប់ទាំងស្រុង។
គម្រោងស្ថាបនាផ្លូវបេតុងខាងលើ ត្រូវបានគេរាយការណ៍ថា ទទួលម៉ៅការសាងសង់ដោយក្រុមហ៊ុន «ធុតៃលី» ដែលមានលោកស្រី មួយគា ជាតំណាង។
តាមការអះអាងរបស់ប្រជាពលរដ្ឋ និងការសង្កេតពីស្ថានភាពជាក់ស្ដែងនៅការដ្ឋាន មានចំណុចមួយចំនួនដែលពួកគេស្នើឱ្យមន្ត្រីជំនាញពិនិត្យឱ្យបានច្បាស់លាស់ ជាពិសេសលើ ដំណើរការចាក់បេតុង ការរៀបចំស្រទាប់ផ្លូវ សម្ភារសំណង់ និងការអនុវត្តតាមលក្ខណៈបច្ចេកទេស។
ប្រជាពលរដ្ឋបារម្ភថា ប្រសិនបើការងារសាងសង់មិនបានអនុវត្តតាមស្តង់ដារបច្ចេកទេស ឬមានការកាត់បន្ថយដំណាក់កាលការងារណាមួយ អាចប៉ះពាល់ដល់ គុណភាព កម្លាំងទ្រទ្រង់ និងអាយុកាលប្រើប្រាស់របស់ផ្លូវ ហើយអាចធ្វើឱ្យផ្លូវឆាប់ប្រេះ បាក់ ស្រុត ឬខូចខាត មុនអាយុកាលដែលគួរតែបានកំណត់។
ក្នុងករណីនេះ ប្រជាពលរដ្ឋស្នើឱ្យរដ្ឋបាលខេត្ត និងមន្ត្រីជំនាញពាក់ព័ន្ធ ពិនិត្យ និងវាយតម្លៃការដ្ឋានជាបន្ទាន់ ហើយប្រសិនបើចាំបាច់ គួរពិចារណាផ្អាកសកម្មភាពការងារមួយរយៈ ដើម្បីឱ្យក្រុមការងារបច្ចេកទេសអាចធ្វើការត្រួតពិនិត្យបានពេញលេញ។
ជាពិសេស ប្រជាពលរដ្ឋចង់ឱ្យមានការផ្ទៀងផ្ទាត់ សៀវភៅបន្ទុក (BOQ) ប្លង់បច្ចេកទេស លក្ខខណ្ឌកិច្ចសន្យា ប្រភេទ និងបរិមាណសម្ភារៈ ព្រមទាំងវិធីសាស្ត្រសាងសង់ជាក់ស្ដែង ថាតើមានភាពស្របគ្នាឬយ៉ាងណា។
ពលរដ្ឋលើកឡើងថា ការចុះត្រួតពិនិត្យនៅដំណាក់កាលដែលការដ្ឋានកំពុងដំណើរការ មានសារៈសំខាន់ ព្រោះអាចជួយរកឃើញ និងកែតម្រូវចំណុចខ្វះខាតបានទាន់ពេលវេលា ជាជាងរង់ចាំរហូតដល់សំណង់បញ្ចប់ ហើយទើបពិនិត្យឃើញបញ្ហា។
តើការដ្ឋាននឹងទទួលបានការត្រួតពិនិត្យកម្រិតណា?
ករណីនេះកំពុងធ្វើឱ្យមានការចាប់អារម្មណ៍ពីប្រជាពលរដ្ឋក្នុងមូលដ្ឋាន ដោយពួកគេចង់ឃើញការចុះពិនិត្យជាក់ស្ដែងពីសំណាក់មន្ត្រីជំនាញ ដើម្បីបញ្ជាក់ឱ្យបានច្បាស់ថា ការសាងសង់ផ្លូវបានអនុវត្តត្រឹមត្រូវតាមបច្ចេកទេស និងកិច្ចសន្យាដែរឬទេ។
ជាមួយគ្នានេះ មហាជនក៏កំពុងរង់ចាំមើលចំណាត់ការរបស់រដ្ឋបាលខេត្តព្រៃវែងថា តើនឹងចាត់ក្រុមការងារចុះអធិការកិច្ច ដើម្បីធ្វើការផ្ទៀងផ្ទាត់ការចោទប្រកាន់ និងការសង្ស័យរបស់ប្រជាពលរដ្ឋដែរឬទេ។
អង្គភាពសារព័ត៌មានយើងសូមបញ្ជាក់ថា ការលើកឡើងខាងលើ គឺជាការអះអាង និងការស្នើសុំរបស់ប្រជាពលរដ្ឋដែលត្រូវការការបញ្ជាក់ពីស្ថាប័នជំនាញតាមរយៈការត្រួតពិនិត្យបច្ចេកទេសជាក់ស្ដែង។ ភាគីក្រុមហ៊ុន «ធុតៃលី» និងស្ថាប័នពាក់ព័ន្ធ មានសិទ្ធិបកស្រាយ បំភ្លឺ ឬផ្តល់ព័ត៌មានបន្ថែម ដើម្បីឱ្យសាធារណជនទទួលបានព័ត៌មានគ្រប់ជ្រុងជ្រោយ និងមានតុល្យភាព។
