ខេត្តព្រៃវែង៖ ដំណើរការពិភាក្សាដេញថ្លៃគម្រោងអភិវឌ្ឍន៍មួយក្នុងស្រុកកញ្ជ្រៀច ខេត្តព្រៃវែង កំពុងតែរងការរិះគន់ និងចោទប្រកាន់យ៉ាងក្តៅគគុកពីសំណាក់តំណាងក្រុមហ៊ុន ក្នុងស្រុកជាច្រើនរូប បន្ទាប់ពីលេចចេញតម្រុយនៃភាពមិនប្រក្រតី ការរៀបចំទុកជាមុន និងខ្វះតម្លាភាពក្នុងការប្រកួតប្រជែង។
ប្រភពព័ត៌មានពីក្រុមហ៊ុនដែលបានចូលរួមក្នុងការដេញថ្លៃនោះបានទម្លាយឲ្យដឹងថា ដំណើរការនៃការបើកសំណើដេញថ្លៃដែលរៀបចំដោយគណៈកម្មាធិការលទ្ធកម្មរដ្ឋបាលស្រុកកញ្ជ្រៀច មានភាពសង្ស័យជាច្រើនចំណុច ជាពិសេសការកំណត់លក្ខខណ្ឌតម្រូវ ដែលហាក់បីដូចជាតម្រូវការពិសេសដើម្បីបើកផ្លូវឲ្យក្រុមហ៊ុន «តួឯក» មួយទទួលបានគម្រោងនេះ ខណៈក្រុមហ៊ុនផ្សេងទៀតត្រូវ បានបដិសេធ ឬរុញច្រានចេញក្រោមរូបភាពបច្ចេកទេសតូចតាច។
ចំណុចសង្ស័យ និងភាពមិនប្រក្រតីសំខាន់ៗ រួមមាន៖
1. ការបិទបាំងព័ត៌មានលទ្ធកម្ម៖ ការផ្សព្វផ្សាយព័ត៌មានអំពីការពិភាក្សាដេញថ្លៃត្រូវបានធ្វើឡើងក្នុងរយៈពេលខ្លីបំផុត ដែលធ្វើឱ្យក្រុមហ៊ុនប្រកួតប្រជែងជាច្រើនមិនមានពេលវេលាគ្រប់គ្រាន់ក្នុងការរៀបចំឯកសារ ឬទិញពាក្យសុំបានទាន់ពេលវេលា។
2. តម្លៃប៉ាន់ស្មាន និងការបែកធ្លាយទិន្នន័យ៖ មានការសង្ស័យថា តម្លៃប៉ាន់ស្មានខាងក្នុង និងសំណើតម្លៃរបស់ក្រុមហ៊ុនផ្សេងៗ ត្រូវបានបែកធ្លាយទៅកាន់ភាគីទីបីជាមុន ធ្វើឱ្យក្រុមហ៊ុន «តួឯក» អាចដាក់តម្លៃទាបជាងគេបន្តិចបន្តួចដើម្បីឈ្នះការដេញថ្លៃ។
3. ការដកបេក្ខភាពដោយអយុត្តិធម៌៖ តំណាងក្រុមហ៊ុនមួយចំនួនបានអះអាងថា ឯកសាររបស់ពួកគេត្រូវបានបដិសេធក្រោមហេតុផលបច្ចេកទេសដែលមិនសមហេតុផល ខណៈក្រុមហ៊ុនដែលឈ្នះដេញថ្លៃបែរជាមានចំណុចខ្វះខាតស្រដៀងគ្នា ប៉ុន្តែត្រូវបានមើលរំលង។
ពាក់ព័ន្ធនឹងករណីនេះ មហាជន និងក្រុមហ៊ុនក្នុងស្រុក បានសម្តែងការព្រួយបារម្ភយ៉ាងខ្លាំងចំពោះតម្លាភាព និងប្រសិទ្ធភាពនៃការប្រើប្រាស់ថវិការដ្ឋ។ដើម្បីឲ្យមានការឆ្លើយពីអាជ្ញាធរ”ក្រុមការងារយើងបានទំនាក់ទំនងទៅកាន់លេខទូរសព្ទ ផ្នែកខាងគណៈកម្មការលទ្ធកម្មស្រុកកញ្ជ្រៀចខលចូលតែមិនមានអ្នកទទួលចំណែកលោក សឿង សុជាត អភិបាលនៃគណៈអភិបាលស្រុកកញ្ជ្រៀច ក្រុមការងារយើងបានរាយការតាមរយៈពេលេឡេក្រាមផ្ទាល់ខ្លួនលោកចូលមើលរួចរាល់តែមិនមានការឆ្លើយតប។
ប្រជាពលរដ្ឋបានអំពាវនាវយ៉ាងទទូចដល់ ក្រសួងមហាផ្ទៃឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រី ក្រសួងមហាផ្ទៃ ឯកឧត្តម សួន សុម៉ាលីន អភិបាលនៃគណៈអភិបាលខេត្តខេត្តព្រៃវែង ជាពិសេស អង្គភាពប្រឆាំងអំពើពុករលួយ (ACU) និងក្រសួងសេដ្ឋកិច្ច និងហិរញ្ញវត្ថុ មេត្តាចុះស៊ើបអង្កេត និងស្រាវជ្រាវលើដំណើរការពិភាក្សាដេញថ្លៃនេះជាបន្ទាន់ ដើម្បីធានាតម្លាភាព និងយុត្តិធម៌សម្រាប់គ្រប់ភាគីពាក់ព័ន្ធ។ដើម្បីគោរពនូវវិជ្ជាជីវៈនិងក្រមសីលធម៌ស្ដីពីរបបសារព័ត៌មានអង្គភាពយើងរង់ចាំបកស្រាយបំភ្លឺពីសមីភាគ និងស្ថាប័នពាន់រៀងរាល់ម៉ោងធ្វើការ។
អង្គភាពយើងខ្ញុំនឹងធ្វើការស្រាវជ្រាវបន្ថែមទៀត និងរីករាយស្វាគមន៍ដល់ការបំភ្លឺប្រសិនបើមានរៀងរាល់ម៉ោងធ្វើការ៕
